hit counter  

KEP, sólido i konfiabel!

Ya pa 48 aña kaba, Credit Union KEP ta brindando un surtido amplio di servisionan kualitativo na su miembronan. Forsa tras di e servisio aki ta nos konvikshon den nos mishon, ku ta bisa asin’aki:

 

Credit Union KEP ta brinda servisio profeshonal, kumbiniente, konfiabel i personal basa riba e nesesidatnan spesífiko di nos miembronan. Nos lo aloká nos rekursonan finansiero i humano na e manera mas efisiente pa asina garantisá ku nos organisashon ta keda unu stabil, salu, seif i sólido ku kontinuamente ta desaroyá i ta sigui mehorá.

 

Nos meta ta pa promové sparmentu i brinda miembronan e oportunidat pa invertí den e credit union i hasi fiansa ku kondishonnan fleksibel. Den nos afan pa kumpli ku nesesidat di nos miembronan KEP ta boga pa, mediante mehorashonnan kontinuo, keda un paso dilanti pa loke ta trata desaroyonan den sektor finansiero i di nos kompetidornan. Ademas, nos ta pone énfasis riba aspektonan edukativo ku ta stimulá i eduká nos miembronan.

 

Na aña 2001 e statutonan di KEP a keda adaptá, habriendo asina e posibilidat pa empresanan lokal por afiliá ku un mínimo di 5 miembro. Awor tantu bo kompania i bo empleadonan, komo nan kasa i yunan mayor di edat por disfrutá di e benefisionan di KEP.

 

KEP ta un organisashon solvabel ku resultadonan sólido i sufisiente likides pa kumpli ku demanda di su miembronan. Sèn di spar di nos miembronan ta wòrdu invertí primeramente den fiansa na otro miembronan. E sobra ta invertí den bono i fondonan ku riesgo hopi abou. Komo un prekoushon nos ta sigurá nos fiansanan pa asina protehá nos miembronan.

 

 

 

KEP: un mihó alternativa

Un credit union ta un kooperativa - miembronan ku ta kompartí un base komun ta djòin den un struktura di kooperativa pa enkurashá sparmentu i fia otro sèn. Afiliando na KEP kompanianan ta duna nan empleadonan un alternativa sano, ku no ta basa riba ganashi manera otro instansianan finansiero ku so ta buska pa maksimalisá nan ganashi.

 

Miembronan mes ta e akshonistanan di un credit union. Esaki ta duna nan derechi di risibí pago di dividendo. Despues di hasi reservanan, KEP ta repartí e dimas na fondo bou di su miembronan komo un dividendo. Di e manera aki nos ta kapas di ofresé interes mas abou pa fiansa, mas haltu pa spar i gastunan redusí pa nos servisionan. Komo ku tur nos asuntunan finansiero ta bou di supervishon di Banko Sentral, miembronan por ta sigurá di e kontinuidat i solvabilidat di KEP. Nos a proba nos abilidat di alkansá metanan i ku KEP ta un forma sólido i konfiabel pa invertí bo sèn. Abo komo miembro ta doño, no djis un kliente, i solamente miembronan por hasi uso di e servisionan di KEP.

 

KEP ta manehá demokrátikamente pa su miembronan; kada miembro tin un voto, no opstante e kantidat di akshon ku e a akumulá.

 

 

Servisionan Prinsipal                                                                                         

 

Fiansa

E fiansanan di KEP ku bo por hasi pa kasi tur okashon ta na interes flèt di 6.5%. Esaki ta un di e opshon mas favorabel aki na Kòrsou. Komo ku pagonan ta bai via salario, no tin kobransa di OB riba e montantenan enbolbí, i ademas KEP no ta kobra gastunan atministrativo adishonal. KEP no ta eksihí pago na man tampoko. Ningun instituto finansiero ta ofresé un dil mas faborabel.

 

Petishon pa fiansa ta keda regla den un frega di wowo i e proseso ta simpel i sin niun dolo'i kabes. Dor di e kondishonnan fleksibel, e porsentahe di fiansa ku ta ser nenga ta hopi chikí. Riba tur esaki, e hecho ta keda ku bo ta akumulando akshon tur luna i ta bin na remarke pa risibí dividendo fin di aña. Bo ta spar, risibí bo plaka fia i gana dividendo sin hasi esfuerso.

 

Spar

Un variedat di kuenta pa skohe for di dje ta dunabu e fleksibilidat pa kumpli ku bo demandanan di spar a korto plaso i pa tèrmino largu. KEP su kuenta di depósito na 2% ta e mihó alternativa kompará ku otro instansia finansiero. Ademas, KEP no ta kobra gastunan atministrativo. loke ta hasi e kuenta di spar aki e alternativa mas faborabel na Kòrsou pa loke ta trata invershon a korto plaso. E mesun bentahanan ta konta pa Time Deposit na 3% di KEP. Aparte di e sèn ku bo ta spar, bo kantidat di akshon ta sigui krese tur luna, loke ta duna e perspektiva di dividendo na fin di aña.

 

Kompra kolektivo

KEP ta boga pa brinda oportunidat amplio pa su miembronan sigui desaroyá nan mes. Pa kumpli ku e propósito aki KEP ta hasi kompra kolektivo di por ehèmpel kòmpiuter i otro instrumentonan edukativo. Di e manera aki miembronan ta risibí un bentaha enorme den preis i alabes e oportunidat di desaroyo pa nan mes i nan famia.

 

Fondo di entiero

Nos tur sa ku nos tin ku bai un dia. Pero 'un dia' ta un tempu indefiní i nos ta kla pa posponé e pensamentunan aki. Konsekuentemente hopi biaha nos ta kuminsá plania muchu lat pa e dia aki. KEP ta kita tur e asuntu ferfelunan aki for di bo kaminda. E fondo di Entiero ta sòru pa e famianan ku keda atras despues ku un miembro bai sosegá, risibí un montante pa kubri e gastunan enbolbí. Esaki ta un manera mas ku KEP ta kuida su miembronan i nan famia.

 

Fondo 70+

Miembronan penshona por sigui disfrutá di e benefishinan di KEP. Pero hopi bia ta difísil pa personanan riba 70 aña haña un fiansa. Banko i kompanianan di seguro ta traha bareranan ku ta hasi sea muchu karu òf kasi imposibel pa personanan riba 70 aña hasi un fiansa. KEP ta boga pa su miembronan riba 70 aña tambe por hasi fiansa. KEP ta boga pa derechinan igual pa tur su miembronan: lei pa un, lei pa tur, inkluyendo esnan riba 70 aña.

 

P'esei a krea un fondo speshal pa kubri e riesgonan enbolbí. Fondo 70+ ta hasi posibel pa miembronan di KEP riba 70 aña, kontinuá nan fiansanan i tambe hasi fiansanan nobo. Miembronan riba 70 aña por asta hasi fiansa te ku 10.000 florin. Komo miembro di KEP bo por ta sigurá ku bo asuntunan finansiero ta den bon man, asta hopi despues di bo añanan di trabou.

 

Dikon djòin ku KEP?

Tempunan ekonómiko difísil ta pidi formanan kreativo pa akomodá e nesesidatnan varia di empleadonan. KEP ta ofresé un forma pa duna mas, sin gasta mas. Ora bo djòin KEP, abo i bo empleadonan lo benefisiá di:

·         E interes mas abou riba fiansa

·         E interes mas haltu riba sèn di spar

·         Mihó resultado di bo invershon kompará ku otro institutonan finansiero lokal.          

·         Un kombinashon úniko i atraktivo di produkto i servisionan.

·         Ningun gastu atministrativo.

·         Kontesta rápido riba petishon di fiansa.

·         Pago di dividendo riba ganashi.

·         Un forsa di kompra kolektivo fuerte ku ta duna mihó dil i balor aditivo pa empleadonan.

·         Benefisionan indirekto, manera un pakete mas atraktivo di benefisionan sekundario.

·         Empleadonan lo no pidibu fiansa mas; nan ta preferá hasi nan fiansa na KEP.

·         Aspektonan edukativo ku KEP ta ofresé lo yuda empleadonan desaroyá.

 

Afiliá ta grátis

Unabes bo a konsiderá e benefisionan di bira un miembro di KEP, bo ta kla pa komprometé. Kompanianan ta responsabel pa nan empleadonan afiliá. Esaki ta nifiká ku pagonan hasi na KEP ta ser kita for di e salario i transferí na KEP. Esaki ta e úniko kondishon pa kompanianan ku ke djòin ku  KEP. Nan ta afiliá grátis. Miembronan si mester paga un montante chikí di 25 florin pa afiliá.

 

Unabes afiliá na KEP, miembronan ta kumpra nan akshonnan pagando un montante mensual. Di e forma aki nan  ta akumulá akshon. Abo i bo empleadonan por habri un kuenta na KEP sin gastu adishonal. Miembresia ta duna derechi inmediato pa hasi uso di tur servisio di KEP. Por hasi fiansa asina ku e di tres pago mensual sosodé.

 

Pues for di promé dia bo ta kuminsá forma bo portafolio kumprando akshon na un balor mínimo di 25 florin pa luna. Tur empleado por mira nan portafolio krese tur luna riba nan 'statement' personalisá. Invertí den KEP ta un adishon seif i konservativo na bo portafolio. Pa bira miembro klik aki


PA E DATOSNAN PERSONAL KEDA AKTUALISA
Apresiabel miembro, si bo adres di kas, email adres of kuenta di banko a kambia por yena un formulario bisando e kambio, asina nos por "update" nos base di datos. Ku esaki ta evita e inkonbeniente di no haña informashon importante.

STATEMENT I RENTE BRIEF
Awor ta posibel pa print bo "Statement" i "Rente Brief" na kas òf na trabou. Kòrda ku bo "Rente Brief" ta bálido si e tin un firma, pasa serka nos na ofisina pa bo haña bo "Rente Brief" firma.